अशी पाखरे

अशी पाखरे येती ;आणिक स्मृति ठेवुनी जाती
 दोन दिसांची रंगतसंगत; दोन दिसांची नाती

चंद्र कोवळा, पहिला वहिला; झाडामागे उभा राहिला
 जरा लाजुनि, जाय उजळुनी; काळोखाच्या राती

फुलून येता फुल बोलले; मी मरणावर हृदय तोलले
 नव्हते नंतर, परी निरंतर; गंधित झाली माती

हात एक तो हळु थरथरला; पाठीवर मायेने फिरला
 देवघरातिल समईमधुनी; अजून जळती वाती

कुठे कुणाच्या घडल्या भेटी; गीत एक मोहरले ओठी
 त्या जुळल्या हृदयांची गाथा; सूर अजुनही गाती 

  - मंगेश पाडगावकर